Fransada iğtişaşlar zamanı 150 nəfər saxlanıldı

Fransanın İl-de-Frans əyalətində, Paris ətrafındakı Nanter qəsəbəsində yol polisinin əmrinə tabe olmayan yeniyetmənin öldürülməsindən sonra başlayan iğtişaşlar zamanı azı 150 nəfər saxlanılıb. Bu barədə ölkənin daxili işlər naziri Jerald Darmanin bildirib.

Yerli KİV-in məlumatına görə, iğtişaşçılar Pablo Pikasso muzeyinə, Sena çayının cənub sahilində Meudon polis bölməsinə və mağazalara soxulmağa cəhd ediblər. Val-d Uaz departamentinin Bezons bələdiyyəsində ibtidai məktəb yandırılıb.

Xatırladaq ki, ölkədə iğtişaşlar iyunun 28-nə keçən gecə Nanterdə polis patrulunun sarı “Mercedes” markalı avtomobili saxlamağa cəhd etməsindən sonra başlayıb. 17 yaşlı Əlcəzair əsilli sürücü asayiş keşikçilərinin tələblərinə tabe olmaqdan imtina edərək qaza basıb, bu zaman polis onu vuraraq yerindəcə öldürüb.

Xidməti silahdan istifadə edən polis əməkdaşı qəsdən adam öldürməkdə şübhəli bilinərək saxlanılıb və həbs olunub. Hadisədən sonra Parisətrafı qəsəbələrdə iğtişaşlar baş qaldırıb, 24 polis əməkdaşı yaralanıb.