Gürcüstanda Rusiyaya etiraz
Mayın 19-da son 4 ildə ilk dəfə Moskva-Tbilisi reysi ilə təyyarə Tbilisi Beynəlxalq Hava Limanına eniş edib.
Günorta saatlarında Gürcüstanın paytaxtına çatan Rusiyanın “Azimut” aviaşirkətinin təyyarəsini Tbilisidə bir qrup etirazçı qarşılayıb. "Xoş gəlmədiniz" şüarı ilə paytaxtın mərkəzi Respublika meydanından Tbilisi Beynəlxalq Hava Limanına avtomobil yürüşü edən narazı gürcülər yol boyu Rusiya əleyhinə mahnılar və şüarlar sələndirərək, Avropa, Ukrayna, eləcə də Gürcüstan bayraqları dalğalandırıblar.
Yürüş iştirakçıları hava limanının qarşısında toplanmış digər etirazçılara qoşularaq, üzərində Rusiya “Terrorçu ölkədir”, “Xoş gəlmədiniz” və digər şüarların yazıldığı plakatları tutublar.
Rusiya təyyarəsinin eniş etdiyi Tbilisi Beynəlxalq Hava Limanında xüsusi təhlükəsizlik tədbirləri görülüb və əraziyə çox sayda polis cəlb edilib. İlk birbaşa uçuşla Gürcüstana gələn Rusiya vətəndaşı isə Gürcüstanda bu cür qarşılanacağını təxmin etdiyini bildirib.
Hava limanında təşkil edilmiş etiraz aksiyasında hüquq-mühafizə orqanlarının əməkdaşları ilə etirazçılar arasında qarşıdurmalar da yaşanıb. Nəticədə bir neçə etirazçı polis tərəfindən saxlanılıb.