Hakan Fidan ABŞ-də Lavrovla görüşdü | Görüşün məqsədi açıqlandı
Rusiyanın xarici işlər naziri Sergey Lavrov Birləşmiş Millətlər Təşkilatının mənzil-qərargahında türkiyəli həmkarı Hakan Fidanla danışıqlar aparıb.
Müzakirə zamanı S.Lavrov və H.Fidan Cənubi Qafqazda aktual problemlərin həlli istiqamətində addımların koordinasiyasının zəruriliyini təsdiqləyiblər.
“Bir sıra beynəlxalq məsələlər ətrafında fikir mübadiləsi aparılıb. Kəskin regional problemlərə, ilk növbədə, Qəzza zolağında, Suriyada, bütövlükdə Yaxın Şərqdə və Qara dəniz bölgəsində, həmçinin Cənubi Qafqazda vəziyyətlə bağlı qarşılıqlı məqbul həll yollarının tapılması maraqları naminə ölkələrimizin addımlarının koordinasiyasının zəruriliyi təsdiqləndi”, – deyə Rusiya Xarici İşlər Nazirliyindən qeyd olunub.
Həmçinin bildirilib ki, nazirlər energetika sahəsində əsas Rusiya-Türkiyə layihələrinin icrasının gedişatına toxunub və qarşıdakı ikitərəfli təmasların cədvəlini müzakirə ediblər.