Hindistan Ordusu ciddi hazırlıq görür | Şiddətli hücumlar yenidən başlayacaq?

“Sindur” əməliyyatı dayandırılıb, amma bitməyib”.

Belə bir bəyanatla Hindistanın Baş naziri Narendra Modi çıxış edib.

O, Pakistan və Hindistan arasında əldə olunan atəşkəsdən sonra xalqa ilk müraciətində də bildirib ki, Hindistan əsgərləri yüksək hazırlıq vəziyyətindədirlər:

“Sindur” əməliyyatı bizim hərbi siyasətimizdir. Bu ad əbəs yerə seçilməyib. Bütün dünya bu adla gücümüzün nəyə qadir olduğunu görəcək. Bu, sadəcə bir ad deyil, yeni siyasətimizlə bağlı konkret addımdır”.

Tərəflər arasında sakitçilik hökm sürsə də, 13 gün davam edən gərginliyin səbəb olduğu dağıntılar göz önündədir.

“Reuters”in Pakistandan yayımladığı kadrlarda isə tavanı uçmuş evlər, divarı dağılmış məscidlər və viran qalmış xəstəxanalar əks olunub.

Yerli sakinlər bildiriblər ki, atəşkəsə gedən yol asan olmadı. İnsan tələfatı, dağıntı və itkilərdən keçdik.

“Nəhayət, tərəflər razılığa gələ bildi. Kaş ki, bu, daha tez baş verərdi. İtki və dağıntılarımız olmazdı. Ümid edirik ki, yenidən belə gərginliklə üzləşmərik”, ‒ sakinlərdən biri bildirib.