“İmran xanı hakimiyyətə gətirənlər də cəzalandırılmalıdır” | Nəvaz Şərif

“Pakistanın indiki problemlərinin səbəbkarı yalnız “Ədalət Hərəkatı” partiyasının təsisçisi İmran Xan yox, həm də onu hakimiyyətə gətirənlərdir”.

Bunu ölkənin sabiq baş naziri, Pakistan Müsəlman Liqasının prezidenti Nəvaz Şərif bəyan edib.

Lahorda yeni seçilmiş parlamentarilərin qarşısında çıxış edərkən o, İmran Xan hökumətinin ölkə iqtisadiyyatını çökdürdüyünü diqqətə çatdırıb.

“Pakistan diplomatiyası da zərər görüb. Bu səbəbdən İmran Xanı hakimiyyətə gətirənlər də cəzalandırılmalıdır. Mənim dövrümdə Pakistan çiçəklənirdi, ölkə Beynəlxalq Valyuta Fondu və başqa kredit təşkilatlarından qurtulmuşdu. Həmin inkişaf tempi qorunsaydı, indi Pakistan iqtisadi göstəricilərinə görə dünyada xüsusi yer tuturdu”, – deyə Nəvaz Şərif vurğulayıb.

Onun sözlərinə görə, İmran Xanın dövründə bütün qazanılan nailiyyətlər uçuruma yuvarlandı.

Pakistanın sabiq baş naziri Nəvaz Şərifin fikrincə, ölkənin bütün problemlərinə səbəb İmran Xan hökumətinin beş ilə yaxın müddətdə heç bir faydalı iş görməməsidir.