İordaniyadakı hərbi obyektə 10 ballistik raket atılıb

İordaniyanın Əl-Əzraq aviabazası 10 ballistik raketlə vurulub.

Bu barədə İran İslam İnqilabı Keşikçiləri Korpusu bəyanat yayıb.

Bildirilib ki, SEPAH-ın Aerokosmik Qüvvələri Yaxın Şərqdə ABŞ-nin komanda-idarəetmə mərkəzini və İordaniyada Əl-Əzraq hərbi hava bazasını 10 ballistik raketlə hədəfə alaraq məhv edib.

“ABŞ-nin təcavüzü təkrarlanarsa, Vaşinqtonun bölgədəki digər hərbi bazalarına ağır atəş zərbələri endiriləcək”, – deyə SEPAH-ın bəyanatında vurğulanıb.

Bu arada ABŞ-nin İrana qarşı hava zərbələrini yenidən bərpa etməsi və Tehranın Fars körfəzində cavab tədbirləri görməsi fonunda Hörmüz boğazından neft tankerlərinin hərəkəti, demək olar ki, tam dayandırılıb. Bu barədə gəmi hərəkəti məlumatları və sahə mənbələri məlumat yayıb.

Bildirilib ki, cümə axşamı səhər saatlarınadək Hörmüz boğazından cəmi iki tanker keçib. Onlardan biri İranın Xarq adasındakı terminalda yüklənmiş və ABŞ sanksiyalarına məruz qalan “Berg 1” xam neft supertankeri olub. "Kpler" analitik şirkətinin açıqlamasına görə, tanker ABŞ sanksiyalarına baxmayaraq, boğazdan keçməyi bacarıb.