İran döyüş meydanında təkdir | Gərginlik hansı ölkələrə sərf edir

İranla İsrail arasında iki gündür yaşanan gərginlik dünya mediasında ən çox müzakirə olunan mövzulardan birinə çevrilib.

Məsələnin ən maraqlı tərəfi isə odur ki, bu münaqişə elə ölkələri də iki cəbhəyə bölüb. Kimisi İsraili haqlı tərəf sayaraq dəstək nümayiş etdirib, kimisi isə İranı həm dəstəkləyib, həm də İsrailə qarşı geri addım atmamağa çağırıb. “Hücumlar artırılmalı, hər kəs cəzasını almalıdır”, – deyə bəyanatlar səsləndirilib.

İsrailli siyasi şərhçi Mixail Finkelin fikrincə, İran İsrailə qarşı döyüş meydanında təkdir. Onu heç bir ölkə dəstəkləmir. Heç İranın hərbi arsenalı da İsraillə baş-başa gələ biləcək gücdə deyil:

“İranı dəstəkləyən ancaq onun əlindən su içib sərmayə sahibi olan terror qruplaşmaları və təşkilatlardır. HƏMAS, “Hizbullah”, Livandakı silahlı qruplaşmalar hara kimi dəstək verə biləcəklər?

Ərəb ölkələrindən Qətər və Küveyt isə sadəcə İrandan qorxaraq dəstək verirmiş kimi bəyanatlar səsləndirməklə öz iqtisadiyyatlarını müdafiə etmək marağını güddüklərini ortaya qoydu. Amma bu bəyanatlar “qorxma, mən səninləyəm” mənasında sözlərdən başqa bir şey deyil. Nə maddi, nə hərbi dəstək olmadıqdan sonra bu sözlərin heç bir dəyəri yoxdur.

Səudiyyə Ərəbistanı da daxil olmaqla Fars körfəzi əhatəsində yerləşən bütün ölkələr İrana nifrət edir. Argentina Prezidentinin bəlli çıxışından sonra hətta ölkəsində İranın terror ölkəsi olması və region üçün təhlükə yaratmasına dair qərar da qəbul olunub.

İsrail ilə İran arasında gərginlik 1979-cu ildən mövcuddur. Dünyadan təcrid olunmuş bu ölkənin yeni gərginliklər yaradaraq daha da nifrət qazanma istəyi təəccüblüdür. İranın nə silahları, nə strategiyası bir işə yaramadı, bu rüsvayçılığı hamımız gördük. Amma əmin olun, İsrail cavab atəşi açacaq. Bunu necə, nə vaxt edəcəyimizə isə biz qərar verəcəyik. Cavabımız qaçılmaz olacaq”.