İran uzunmüddətli müdafiəyə hazır olduğunu bəyan edib

“Tehran öz ərazilərini və əhalisini qorumaq üçün bütün mövcud resurslardan istifadə etmək niyyətindədir”.

Bunu İranın xarici işlər nazirinin müavini Məcid Taxt-Ravançi CNN-ə müsahibəsində deyib.

ABŞ Prezidenti Donald Trampın bir aydan çox davam edə biləcəyini dediyi zərbələrə İranın neçə müddət tab gətirəcəyi barədə suala cavab verən diplomat ölkəsinin qətiyyətini vurğulayıb.

“Biz imkanlarımız daxilində özümüzü müdafiə edəcəyik və demək istəyirəm ki, zamanın həlledici əhəmiyyəti yoxdur. Biz nəyin bahasına olursa-olsun, suverenliyimizin və xalqımızın müdafiəsi üçün lazım olan hər şeyi edəcəyik”, – deyə o bəyan edib.

Daha əvvəl Donald Tramp ABŞ Quru Qoşunlarının İrana yeridilməsi ehtimalını istisna etmədiyini bildirib.

Bununla yanaşı, “Bloomberg”in məlumatına görə, ABŞ-nin Yaxın Şərqdəki müttəfiqləri Ağ Ev rəhbərini İrana qarşı əməliyyatı uzunmüddətli etməməyə inandırmağa çalışır.

Bu arada, İordaniya Kralı II Abdullah Donald Trampı bölgədə gərginliyi azaltmağa çağırıb. O, Donald Trampla telefon danışığında regionda dayanıqlı deeskalasiyaya nail olunmasının vacibliyini vurğulayıb.