İran və Oman Hörmüz boğazı ilə bağlı yeni mexanizm üzrə danışıqlar aparır - Baku TV

İran və Oman Hörmüz boğazı vasitəsilə gəmiçiliyə nəzarəti rəsmiləşdirəcək daimi rüsum sisteminin yaradılması barədə danışıqlar aparır.

Bu barədə "Bloomberg" İranın Fransadakı səfiri Mohammad Amin-Nejada istinadən məlumat yayıb.

"İran və Oman həm təhlükəsizliyin təmin edilməsi, həm də gəmiçiliyin ən səmərəli şəkildə idarə olunması üçün bütün resursları səfərbər etməlidir. Bu, xərclər tələb edəcək və təbii ki, bu axından faydalanmaq istəyənlər də öz hissələrini ödəməli olacaqlar", – deyə diplomat qeyd edib.

Bu arada, Pakistan nümayəndələri ABŞ və İsrailin İranla münaqişəsinin sülh yolu ilə başa çatdırılması səyləri çərçivəsində Tehrana səfər ediblər. Bu barədə ABŞ-nin dövlət katibi Marko Rubio bildirib.

"Pakistanlılar İrana yola düşəcəklər. İranla danışıqlarda müəyyən irəliləyiş əldə olunub. Bəzi yaxşı əlamətlər var", – deyə o qeyd edib.

Lakin dövlət katibi vaxtından əvvəl nikbinliyə qapılmamaq barədə xəbərdarlıq edərək bildirib ki, yaxın bir neçə gün ərzində vəziyyət aydınlaşacaq.