İrandan cavab gecikmədi | Hörmüz boğazı "savaş meydanı"na çevrilib? - Baku TV

İran bəzi ölkələrin gəmilərinin Hörmüz boğazı vasitəsilə keçməsinə icazə verib.

Bu barədə İranın xarici işlər nazirinin müavini Məcid Taxt-Rəvançi danışıb.

O həmçinin ABŞ və İsraillə müharibə şəraitində su yolunun faktiki olaraq bağlı qalmasına baxmayaraq, İranın boğazda mina yerləşdirməsi iddialarını təkzib edib.

"Bəzi ölkələr artıq boğazdan keçməklə bağlı bizimlə danışıb və biz onlarla əməkdaşlıq etmişik. İran hesab edir ki, təcavüzə qoşulan ölkələr Hörmüz boğazından təhlükəsiz keçiddən faydalanmamalıdır. Biz istəyirik ki, İrana bir daha müharibə tətbiq olunmayacağına əmin olaq. 2025-ci ilin iyununda müharibə başlayanda, 12 gündən sonra guya hərbi əməliyyatlar dayandırıldı. Lakin 8-9 aydan sonra onlar yenidən toparlanaraq bunu təkrar etdilər", – deyə diplomat bildirib.

İran həmçinin gəmilərin Hörmüz boğazından keçməsi üçün şərtlərini açıqlayıb. Hörmüz boğazından keçən gəmilər İran Hərbi Dəniz Qüvvələri ilə razılaşdırılmalıdır.

Bu barədə İran Xarici İşlər Nazirliyinin sözçüsü İsmayıl Bəqai bildirib. "Naviqasiyanın təhlükəsizliyini təmin etmək üçün gəmilər öz keçidlərini İran Hərbi Dəniz Qüvvələri ilə əlaqələndirməlidir", – deyə diplomat vurğulayıb.

Bəqai qeyd edib ki, ABŞ və İsrailin bölgədə yaratdığı etibarsızlıq gəmi daşımalarına mənfi təsir göstərə bilər, lakin Tehran Hörmüz boğazının təhlükəli olmasını istəmir.