İranın Suriyadakı konsulluğunun binasına hücum edildi | Ölənlər var
İsrail İranın Suriyadakı konsulluq binası və İran səfirinin iqamətgahının yaxınlığına hava zərbəsi endirib. Bu barədə İran mediası məlumat yayıb.
“Tasnim” xəbər agentliyinin məlumatına görə, İsrail Dəməşqdə İran səfirliyinin yaxınlığındakı binaya hava zərbəsi endirib.
Zərbələr nəticəsində ölənlər var. Bu barədə İranın Suriyadakı səfiri Hüseyn Əkbəri bildirib.
“İsrailin Dəməşqə hücumu nəticəsində 5 və ya 7 nəfərin öldüyünü ehtimal edirik”, – deyə səfir bildirib.
Rəsmi olmayan məlumatlara görə, hücumda bir neçə iranlı diplomat ölüb.
Dövlət mediası daha əvvəl bildirmişdi ki, bu gün tətil olduğu üçün binada heç bir işçi olmayıb.
Suriya Müdafiə Nazirliyi isə İranın Dəməşqdəki konsulluq binasının İsrailin hücumu nəticəsində dağıdıldığını bildirib. Qeyd edilib ki, hücum nəticəsində binada olan bütün insanlar ölüb və ya yaralanıb.
İsrailin Suriyaya hava hücumu zamanı İranın İslam İnqilabı Keşikçilər Korpusunun yüksək rütbəli briqada generalı Məhəmməd Rza Zahedi və onun müavini Məhəmməd Hacı Rəhimi, həmçinin briqada generalı Hüseyn Əmirullah öldürülüb.