İranlı nazir təyinatından 10 gün sonra niyə istefa verdi?

2013-2021-ci illərdə İranın xarici işlər naziri çalışan və ABŞ ilə danışıqların tərəfdarı olan ölkənin strateji məsələlər üzrə vitse-prezidenti Məhəmməd Cavad Zərif cəmi 10 gün vəzifədə qaldıqdan sonra istefa verib. Bu barədə o, özünün “X” hesabında yazıb.

“Mən işimin nəticəsindən razı deyiləm. Digər problemlərlə yanaşı, bu, məni universitetdə yolumu davam etdirməyə məcbur etdi”, – deyə M.C.Zərif qeyd edib.

Söhbət iyulun 5-də İranda keçirilən prezident seçkisində Məsud Pezeşkianın qələbəsindən sonra M.C.Zərifin rəhbərlik etdiyi Məşvərət Şurasından gedir. O, avqustun 11-də təsdiq üçün parlamentə təqdim edilən yeni kabinet üçün namizədlərin seçilməsinə cavabdeh idi.

İranın islahatçı qanadının nümayəndəsi olan M.C.Zərif ABŞ ilə dialoqun əsas tərəfdarlarından biri hesab olunur və buna görə İran mühafizəkarları tərəfindən tənqid edilir. Diplomat 2015-ci ildə Tehranın nüvə proqramına dair sazişin hazırlanmasında və bağlanmasında fəal iştirak edib. O, ABŞ dövlət katibi və digər rəsmiləri ilə dəfələrlə danışıqlar aparıb.