İsrail “Hizbullah”ın qəfil hücumuna hazırlaşır?

İsrail Müdafiə Qüvvələri Livandakı Biqa vadisinin şərq hissəsinə havadan zərbə endirdiyini təsdiqləyib.

Hədəf “Hizbullah” döyüşçülərinin toplandığı təlim düşərgəsi və yüksək dəqiqlikli raketlər istehsal edən obyekt olub.

“Hizbullah”ın Livanın şimalındakı hərbi obyektinə də zərbə endirilib. Bununla yanaşı, qeyd etmək lazımdır ki, İsrail Ordusuna 1 həftə ərzində 30 saat hərbi təlim keçirilib.

“The Jerusalem Post”da yayılan məlumata görə, buna səbəb Livanda planlaşdırılan yeni hərbi əməliyyata hazırlıqdır. Hava, dəniz və qurudan hücumun həyata keçirilməsi gözlənilir.

Qəzza zolağında atəşkəs əldə olunandan sonra İsrail Livana qarşı müdafiə rejimindən hücum fazasına keçib. Bununla yanaşı, İsrail tərəfi “Hizbullah”ın müdafiə qabiliyyətini yoxlamaq istəyir. Çünki liderlərinin öldürülməsindən sonra bu qruplaşmanın İsrailə hücumlarında fasilə yaranıb.

Bəzi ekspertlər “Hizbullah”ın tam gücdən düşdüyünü, digərləri isə gizli formada güc topladığını düşünürlər. İsrail-HƏMAS savaşı və Yəmən husilərinin Təl-Əvivə raket hücumları “Hizbullah”ın diqqətdən kənarda qalmasına səbəb olmuşdu.

Belə olan halda isə qruplaşma öz himayədarları vasitəsilə möhkəmləndirilə bilər. Buna görə də İsrail Ordusu müxtəlif hücum planları hazırlayır. Məqsəd “Hizbullah”ın qəfil hücumunun qarşısını almaqdır. Yoxsa Livanın cənub sərhədinə yaxın ərazidə 5 post qurulmazdı. İsrail bu hərbi məntəqələri “Hizbullah”a qarşı ön cəbhə adlandırır.