İsrail-Livan münaqişəsi fonunda Eyal Zamir sərt xəbərdarlıq edib - Baku TV

İsrail Ordusunun Baş Qərargah rəisi, general-leytenant Eyal Zamir İsraillə Livan arasında əldə olunan razılaşmanı "tarixi və mühüm" adlandırıb.

"The Times of Israel" xəbər verir ki, onun sözlərinə görə, bu razılaşma İsrail Ordusunun son aylarda əldə etdiyi hərbi uğurlar nəticəsində mümkün olub.

Zamir bildirib ki, məhz hərbi nailiyyətlər siyasi rəhbərliyə diplomatik razılaşma əldə etmək üçün şərait yaradıb.

Baş Qərargah rəisi onu da vurğulayıb ki, İsrail Ordusu əldə olunan təhlükəsizlik üstünlüyünü qorumaqda davam edəcək və zərurət yarandığı halda fəaliyyətini davam etdirməyə hazırdır.

O qeyd edib ki, hərbçilər ölkənin təhlükəsizliyini təmin etmək məqsədilə bütün istiqamətlərdə yüksək hazırlıq vəziyyətində qalırlar.

Qeyd edək ki, iyunun 26-da İsrail və Livan ABŞ-nin vasitəçiliyi ilə İsrail Müdafiə Ordusu bölmələrinin Livanın cənubundakı bir sıra rayonlardan mərhələli şəkildə çıxarılmasının başlanmasını nəzərdə tutan çərçivə sazişi imzalayıblar. Sənəd münaqişənin dayandırılmasını, Livanın özünün bütün ərazisi üzərində tam suveren nəzarətinin bərpasını, eləcə də qeyri-dövlət silahlı birləşmələrin tərksilah edilməsini və onlarla bağlı infrastrukturun ləğvini nəzərdə tutur. Bu şərtlər yerinə yetirildikdən sonra İsrail qüvvələri mərhələli şəkildə ölkədən çıxarılacaq.