İsrail təcili yardım avtomobillərinin vurulmasını "uğursuzluq" adlandırdı

“Bu, peşəkar uğursuzluqdur”.

Bu sözləri İsrail Ordusu Qəzzada 15 nəfər təcili tibbi yardım işçisinin ölümünə səbəb olan hücumlar barəsində açıqlaması zamanı bildirib.

Fələstin Qızıl Aypara Cəmiyyəti üçün çalışan bir qrup əməkdaşın öldürülməsi bütün dünyada etirazlara səbəb olub. Təl-Əviv tərəfi isə məsələni uğursuzluq kimi qiymətləndirib. Bu açıqlama birmənalı qarşılanmayıb.

İsrail Müdafiə Ordusunun yaydığı rəsmi bəyanatda belə qeyd olunur: “Biz mülki şəxslərə dəyən ziyana görə təəssüflənirik”.

İsrail Ordusunun general-mayoru Yoav Har-Even isə “Bu, səhvdir. Səhvlər olur. Ümid edirəm ki, bu, bir də olmayacaq”, ‒ deyə bildirib.

Maraqlıdır, Even 90 dəqiqəlik brifinq zamanı hansı komandir və ya qüvvələrin ucbatından hadisənin baş verdiyi barəsində bir söz belə deməyib.

Qeyd edək ki, baş verənlərə görə İsrail Ordusunun 14-cü briqada komandiri töhmət məktubu alıb. Eyni zamanda hücumlarda iştirak edən komandir müavini də tutduğu vəzifədən azad edilib.

Fələstinin Qızıl Aypara Cəmiyyəti isə baş verənlərə görə İsrail tərəfini qınayıb. “Guya siz maşının işıqlarını görmədiniz və onların təcili yardım maşınları olduğunu dərk etmədiniz? Videodan görünür ki, siz yalan danışmısınız. Bütün dəlillər göz qabağındadır”, ‒ deyə qurum əlavə edib.