İstanbulu silkələyən istintaq genişlənir

İstanbul Böyükşəhər Bələdiyyəsinin keçmiş sədri, hazırda həbsdə saxlanılan Əkrəm İmamoğlu barəsində casusluq ittihamı ilə yeni istintaq başlanılıb.

İstintaq çərçivəsində həmçinin Ə.İmamoğlunun seçki kampaniyasının direktoru Necati Özkan və jurnalist Mərdan Yanardağ haqqında da araşdırma aparılır. Mərdan Yanardağ artıq saxlanılıb.

İstintaqın başladılmasına səbəb əvvəlcə xarici dövlətlərlə əlaqədə şübhəli bilinən və daha əvvəl agentlik fəaliyyəti ittihamı ilə həbs edilmiş bir şəxsin elektron məlumat bazasından çıxarılan sənədlərdir. Həmin rəqəmsal materiallarda xüsusi rabitə yazışmaları, şifrli əlaqə kanalları və üçüncü ölkənin strukturları ilə mümkün əməkdaşlıq izlərinin olduğu iddia olunur.

Araşdırma çərçivəsində İstanbul Böyükşəhər Bələdiyyəsinə məxsus bəzi elektron platformalardakı seçici məlumatları və istifadəçi bazalarının xaricə ötürülməsi ehtimalı da dəyərləndirilir. Məhz bu iddia istintaqın daha da genişləndirilməsinə səbəb olub.

Qeyd edək ki, Ə.İmamoğlu bundan əvvəl korrupsiya və vəzifə səlahiyyətlərindən sui-istifadə ittihamı ilə saxlanılmışdı.