Kainatdakı parlaq püskürmə nələri üzə çıxaracaq? | Maraqlı araşdırmanın detalları

NASA-nın alimləri 11 milyard işıq ili uzaqlıqda yerləşən iki qədim kvazarda güclü enerji püskürmələrini müşahidə ediblər. Kəşf edilən axınlardan biri 300 min işıq ili uzunluğundadır.

Onun daşıdığı enerji isə 10 trilyon Günəşin enerjisinə bərabərdir.

Maraqlısı odur ki, bu axınlar o qədər uzaqdadır ki, hələ də yalnız rentgen şüalanması vasitəsilə görünə bilir.

Alimlər hesab edirlər ki, bu fenomen kainatın ilkin dövrlərində superkütləli qara dəliklərin necə bu qədər sürətlə böyüdüyünü anlamağa kömək edəcək.

Kvazarlar mərkəzində superkütləli qara dəlik yerləşən, ətrafı çox parlaq akkresiya diski ilə əhatələnmiş nəhəng kosmik obyektdir. Bu qara dəliklərə düşən maddə sürətlə qızaraq parlayır və nəticədə kvazarlar kainatdakı ən parlaq obyektlərdən birinə çevrilir.

Bundan əlavə, kvazarlar çox güclü enerji və şüalanma axınları buraxır. Bu axınlar adətən qara dəliyin ətrafındakı diskin müstəvisinə perpendikulyar şəkildə yönəlir və minlərlə işıq ili uzaqlığa qədər yayıla bilir.