Lavrovla bağlı bu xəbər gündəmi silkələdi

Rusiya xarici işlər naziri Sergey Lavrovun ictimaiyyət önündə görünməməsi müzakirələrə səbəb olub.

Məlumata görə, Lavrovun yoxa çıxmasını onun səhhəti ilə əlaqələndirirlər.

Belə ki, Lavrovun Rusiya Təhlükəsizlik Şurasının ötən həftə keçirilən iclasında iştirak etməməsi cəmiyyətdə suallar doğurub.

Rusiyanın “Kommersant” nəşri onun iclasdan “razılaşdırılmış şəkildə” kənarda qaldığını yazıb. Bununla yanaşı, noyabrın 4-də Putin imzaladığı fərmanla Cənubi Afrikanın Yohannesburq şəhərində keçiriləcək Böyük İyirmilik sammitində Rusiya nümayəndə heyətinə Lavrovun deyil, Prezident administrasiyası rəhbərinin müavini Maksim Oreşkinin rəhbərlik edəcəyini elan edib.

Bu iki hadisə Lavrovun “yoxa çıxması” ilə bağlı müxtəlif ehtimalları gücləndirib. Bəzi ekspertlər bunu Kreml daxilində mümkün siyasi dəyişikliklərin və ya Lavrovun Putinə təsir imkanlarının azaldılmasının əlaməti kimi qiymətləndirir.

Xüsusilə də ABŞ Prezidenti Donald Trampla Budapeştdə planlaşdırılan görüşün ləğvindən sonra belə versiyalar artıb. Həmin görüşün təşkili üzrə danışıqları məhz Lavrov aparırdı, lakin ABŞ-nin dövlət katibi Marko Rubio ilə telefon danışığından sonra sammit təxirə salınıb.

Bütün bu iddialara cavab olaraq Kremlin mətbuat katibi Dmitri Peskov açıqlama verib. O, Lavrovun vəzifəsində olduğunu və işini aktiv şəkildə davam etdirdiyini bildirib.

“Sergey Viktoroviç işindədir, həm də çox aktiv şəkildə işləməkdədir. Bu məlumatların hamısı tamamilə yalandır, onlara diqqət yetirməyə dəyməz. Hər şey qaydasındadır. Uyğun ictimai tədbirlər olanda naziri görəcəksiniz, ‒ deyə Peskov vurğulayıb.