Zaxarovadan qalmaqallı açıqlama | Aİ Ermənistanda rusofobiyanı qızışdırır?

"Avropa İttifaqı Ermənistana qrant və boş vədlər verir. Gürcüstanda olduğu kimi, Ermənistanda da neoliberalizmi təbliğ edirlər. İctimai rəyi manipulyasiya edərək rusofobiya səpirlər".

Bunu Rusiya Xarici İşlər Nazirliyinin rəsmi nümayəndəsi Mariya Zaxarova brifinq zamanı bildirib.

"Bildiyiniz kimi, onlar indi Ermənistanda müşahidə missiyasını, faktiki olaraq isə kəşfiyyat missiyasını yerləşdirərək ölkəni öz hərbi-siyasi orbitinə çəkiblər. Bir sözlə, onlar rus və erməni xalqları arasında çoxəsrlik dostluğu məhv etmək istəyirlər. Təbii ki, Avropa İttifaqının Cənubi Qafqaz ölkələrinə təklif etdiyi düstur artıq açıqdır və bu paradoksdur. Belədir: Moldova və Ukraynadan nümunə götürün! Avropaya inteqrasiya reklamı...", – Zaxarova bildirib.

Onun sözlərinə görə, Qərbin, o cümlədən Aİ-nin destruktiv siyasəti Cənubi Qafqazda, həqiqətən də, vüsət alır.

"Aİ onlara nifrət edir. Bu faktdır. Baxın Gürcüstana. Regiondakı təhdidlər və təzyiqlər Brüssel siyasəti üçün bir növ rutinə çevrilib", – Zaxarova deyib.

Rusiya Xarici İşlər Nazirliyinin rəsmi nümayəndəsi Gürcüstanı "parlaq nümunə" kimi göstərib.

"Onlar gürcüləri öz suverenliklərini müdafiə etmək cəhdlərinə görə cəzalandırmaq istəyirlər. Kimləsə koalisiya yaratdıqlarına görə, kimisə dəstəklədiklərinə görə yox, sadəcə olaraq, bu dövlətin xalqı öz ölkəsində öz qanunları ilə yaşamaq qərarına gəldiyinə görə. Ölkəni daha böyük oyunda piyadaya çevirməyə çalışırlar. Qərb maraqlarını güdən siyasi qüvvələrə sözün əsl mənasında hər şeyi etməyə icazə verilir və təbii ki, verdikləri külli miqdarda pul müqabilində", – Rusiya XİN nümayəndəsi vurğulayıb.