Mənim sülh planımı oxumadığına görə... | Trampdan Zelenskiyə mesaj - Baku TV

ABŞ Prezidenti Donald Tramp Ukrayna Prezidenti Volodimir Zelenskini onun təqdim etdiyi sülh planını oxumamaqda günahlandırıb.

Trampın sözlərinə görə, ukraynalı həmkarının bu addımı onu məyus edib:

“Biz Rusiya Prezidenti Putinlə əlaqə saxlayırıq, Ukrayna lideri Zelenski ilə təmasları da davam etdiririk. Etiraf etməliyəm ki, Zelenskinin hələ də mənim sülh planımı oxumamasına görə məyusam. Ukraynalılar buna razı olsa da, Prezident təklifimizi qəbul etmir. Rusiya tərəfi də planla həmfikirdir”.

Volodimir Zelenski isə Ağ Ev lideri ilə danışıqların asan olmasa da, məhsuldar keçdiyini vurğulayıb.

“Biz Stiv Uitkof və Cared Kuşnerlə müzakirələr apardıq. Mən onları daim bizimlə birgə işləməyə hazır olduqları üçün təqdir edirəm. ABŞ rəsmiləri Ukrayna ilə bağlı lazımi məsələlərdən xəbərdardırlar. Müzakirələr konstruktiv keçsə də, bizim üçün asan deyildi. Biz birgə fəaliyyətə davam edəcəyik. London və Brüsseldə görüşlər baş tutacaq”, – Zelenski bildirib.

Qeyd edək ki, Ukrayna-Rusiya arasında sülhün təmin edilməsi yolunda müzakirələr davam edir. Cəbhədə vəziyyət gərgin olaraq qalır. Tərəflər arasında danışıqlar isə ərazi məsələsinə görə dalana dirənib.