“Meta” Fransada hərbi çevrilişlə bağlı saxta videonu silməkdən imtina edib

"Meta" şirkəti Fransada guya hərbi çevriliş baş verməsi ilə bağlı süni intellekt vasitəsilə hazırlanmış saxta videonu silməkdən ilkin mərhələdə imtina edib.

Ötən həftə fransızdilli sosial şəbəkələrdə yayılmağa başlayan video mövcud olmayan Fransız televiziya kanalının reportajı kimi təqdim olunub. Videoda Prezident Emmanuel Makronun hakimiyyətdən devrilə biləcəyi iddia edilib. Sözügedən material süni intellekt vasitəsilə yaradılıb.

"France 24" telekanalının məlumatına görə, bazar günü Afrikanın liderlərindən biri Makrona zəng edərək ölkədə vəziyyətin normal olub-olmadığını soruşub. Həmin vaxta qədər videonun yalnız ilkin yüklənmiş versiyası 13 milyon baxış toplayıb.

Prezident Makron bildirib ki, saxta xəbər onu guya əyləndirib, lakin buna baxmayaraq, komandası "Meta" ilə əlaqə saxlayaraq videonun silinməsini xahiş edib. Lakin şirkət ilk mərhələdə videonun platforma qaydalarını pozmadığını əsas gətirərək silinməsindən imtina edib.

"Bu insanlar bizimlə istehza edirlər. Onlar ictimai debatların konstruktivliyinə əhəmiyyət vermir, demokratiyaların suverenliyini məsxərəyə qoyur və bizi təhlükə altına salırlar", – deyə Makronun sözlərini telekanal sitat gətirib.

Məlumata əsasən, çərşənbə günü səhər saatlarında video hələ də sosial şəbəkədə mövcud olub, yalnız "bu məzmun real görünməsi üçün rəqəmsal texnologiyalar vasitəsilə yaradılmış və ya dəyişdirilmiş ola bilər" qeydi əlavə edilib. Bir neçə saat sonra isə klipin platformadan silindiyi ehtimal olunur.

Qeyd edək ki, "Meta" şirkəti "Facebook" və "Instagram" platformalarının sahibidir. Şirkətin fəaliyyəti Rusiya ərazisində ekstremist kimi tanınaraq qadağan edilib.