Misirdən geri addım: Misir fələstinli qaçqınları qəbul etməyəcək

İsraillə HƏMAS arasında 4 günlük humanitar atəşkəs qərarının elan edilməsindən sonra Misir dövləti ciddi narahatlıq keçirir.

Atəşkəs razılaşmasına qədər rəsmi Qahirə Qəzza zolağından təxliyə olunan insanlara müvəqqəti qucaq açmağa hazır olduğunu bildirsə də, indi bu fikrindən daşınıb.

Misirin Baş naziri Mustafa Madbuli ölkəsinin İsrailin təzyiqinə boyun əyməyəcəyini və Qəzza zolağından olan fələstinli qaçqınları qəbul etmək niyyətində olmadığını bildirib. O, fələstinli qaçqınları Misirin milli təhlükəsizliyi üçün təhdid adlandırıb.

Baş nazir qeyd edib ki, Misir Sinay yarımadasını qorumaq üçün milyonlarla fələstinlinin həyatını qurban verməyə hazırdır və İsrailin bu yarımadaya dair planları yolverilməzdir.

Qeyd edək ki, noyabrın 21-də “Associated Press” agentliyi İsrailin Baş naziri Benyamin Netanyahunun Qəzza zolağının 2,3 milyon sakinini bölgədən Sinay yarımadasına qovmaq planı barədə məlumat vermişdi.

Plana görə, onlar sahildən Misir ərazisinə sıxışdırılmalıdırlar. Məhz bu fakt Misir hakimiyyətini olduqca narahat edir. M.Madbuli həmçinin qeyd edib ki, Misir öz sərhədlərinin qorunması üçün bütün tədbirləri görəcək.