"Növbəti 100 gün həledici ola bilər" | Donald Tusk

Polşanın Baş naziri Donald Tusk hesab edir ki, qarşıdakı 100 gün Ukraynadakı müharibənin taleyi baxımından həlledici ola bilər.

Bu barədə o, jurnalistlər üçün keçirdiyi brifinqdə danışıb.

Ukrayna Prezidenti Volodimir Zelenski ilə telefon danışığını xatırladan Donald Tusk bildirib ki, məsələ tamamilə aydındır: qarşıdakı 100 gün bu müharibənin nəticəsini müəyyən edə bilər və şanslar 50/50-dir.

Polşa hökumətinin başçısı ABŞ Prezidenti Donald Trampı, bəzi digər dünya liderlərini və "SpaceX" şirkətinin baş icraçı direktoru İlon Maskı müharibənin nəticəsinə təsir göstərə biləcək ən nüfuzlu şəxslər sırasında göstərib.

Tusk həmçinin qeyd edib ki, Polşanın hava məkanına daxil olan Rusiyanın "X-101" raketi ilə bağlı insident onun Ukraynaya dəstək əzmini daha da gücləndirib.

"Polşanın təhlükəsizliyi birbaşa və şübhəsiz ki, Ukrayna hərbçilərinin, o cümlədən hava məkanında göstərdikləri effektiv fəaliyyətdən asılıdır. Əgər ukraynalıların mütəmadi olaraq xahiş etdikləri vasitələrdən daha çoxu olsaydı, ehtimal ki, bu raket Polşa istiqamətində buraxılmazdı", – deyə o bildirib.

Baş nazir vurğulayıb ki, Polşa Ukraynanın bu müharibədə məğlub olmaması üçün əlindən gələn hər şeyi etməyə davam edəcək.