Onlara izah etdi ki... | Şahbaz Şərifin xüsusi köməkçisi Lavrovla görüşündən danışdı

Pakistan Baş naziri Şahbaz Şərif Rusiya Prezidenti Vladimir Putindən Hindistanla münaqişənin həllində dəstək istəyib.

Bunu Rusiyada səfərdə olan Pakistan Baş nazirinin xüsusi köməkçisi Seyid Tarik Fatemi deyib.

“Qonşular hər an müharibəyə başlamağa hazır olduqları bir vəziyyətdə yaşaya bilməzlər. Biz ABŞ, Avropa İttifaqı və Rusiyaya mühüm şəxslər göndərərək izah etdik ki, hər hansı bir ölkədən, BMT-dən və ya Hindistan və Pakistan arasında neytral olan ölkələrdən gələn hər hansı təklif olsa, onlarla oturub məsələni həll etməyə hazırıq.

Dünən Rusiya xarici işlər naziri Sergey Lavrovla görüşüm oldu. Mən ona Baş nazirimin məktubunu və zati-aliləri cənab V.Putinə müraciətini çatdırdım. Biz bütün bu ölkələrdən Hindistan və Pakistanın danışıqlar masası arxasına oturaraq sülh razılaşmasına nail olmaq üçün öz təsirlərindən istifadə etmələrini xahiş etdik”, ‒ T.Fatemi bildirib.

O həmçinin qeyd edib ki, Pakistan Rusiyadan Hindistanla münasibətlərdə gərginliyin dərəcəsini azalda biləcək hər hansı təşəbbüs gözləyir:

“Biz temperaturu azalda biləcək istənilən təşəbbüsdə Rusiyanın dəstəyini görmək üçün buradayıq. Pakistan və Hindistan danışıqlar masasına oturmalıdır”.