Papuaşvilidən siyasətçilərin əfv edilməsi təklifi ilə bağlı açıqlama | Danışmaq imkanına belə...

“Gürcüstan Prezidenti Mixeil Kavelaşvilinin siyasətçilərin əfv olunması ilə bağlı təklifi Mixeil Saakaşviliyə aid deyil”.

Bunu Gürcüstan parlamentinin sədri Şalva Papuaşvili jurnalistlərə açıqlamasında deyib.

O, dövlət başçısının təklifinin Ukrayna vətəndaşlarına şamil edilmədiyini vurğulayıb.

“M.Saakaşvili Ukrayna vətəndaşıdır. O, nəinki seçkilərdə iştirak etməli deyil, hətta seçkilər haqqında danışmaq imkanına belə malik olmamalıdır, çünki bu, müdaxilədir. Mixeil Kavelaşvilinin təklifi yalnız Gürcüstan Konstitusiyasını pozmuş bəzi siyasətçilərə aiddir”, ‒ spiker söyləyib.

Xatırladaq ki, Gürcüstanın aparıcı müxalif partiya və birliklərinin liderləri 7 və 8 ay müddətinə azadlıqdan məhrum ediliblər. Yeddi nəfər müxalif siyasətçi parlamentin M.Saakaşvilinin hakimiyyəti dövründə törədilmiş cinayətləri araşdıran müvəqqəti istintaq komissiyasının qanuni tələbini yerinə yetirməməkdə ittiham olunurdu.

Gürcüstan Prezidenti M.Kavelaşvili iyulun 4-də həbsdə olan siyasətçiləri əfv üçün müraciət etməyə çağırıb. O bildirib ki, həmin siyasətçilər oktyabrın 4-də keçiriləcək yerli seçkilərdə iştiraka hazırlıqlarını təsdiqləsələr, onlarla bağlı amnistiya aktını dərhal imzalayacaq.

M.Saakaşvili 2021-ci ilin sentyabrın 29-da 8 illik mühacirətdən sonra gizli yolla Gürcüstana dönüb. O, bir neçə gündən sonra – oktyabrın 1-də saxlanılıb. Eks-prezident sərhədi qanunsuz keçmə ittihamına görə 4 il 6 ay, 2009-2012-ci illərdə büdcə vəsaitlərini şəxsi ehtiyacları üçün xərclədiyinə görə isə 9 il müddətinə azadlıqdan məhrum edilib. Onunla bağlı digər cinayət işləri üzrə məhkəmə prosesləri davam etdirilir.