Paşinyan Eçmiədzini II Qaregindən azad edə biləcək?

Ermənistanın Baş Prokurorluğunun binasının yanında siyasi məhbusların azad olunması tələbi ilə aksiya keçirilib.

Etirazçılar siyasətçilərlə yanaşı, İrəvanda çevriliş planlaşdıran bəzi keşişlərin də azad olunmasını tələb ediblər.

Ermənistanın Baş naziri Nikol Paşinyan isə oliqarx-kilsə-müxalifət koalisiyasına qarşı mübarizəni davam etdirir.

Onun sözlərinə görə, Eçmiədzin Ktriç Nersisyandan azad olunacaq.

Xatırladaq ki, Ktriç Nersisyan, yəni bütün ermənilərin katolikosu II Qareginin qardaşı ilə qardaşı oğlu xuliqanlıq və seçki kampaniyasına maneə törətmək ittihamları ilə həbs ediliblər.

Paşinyanı devirmək istəyən arxiyepiskoplar Qalstanyan və Acapahyan da həbsdədir. II Qareginə pul ayıran Samvel Karapetyan və silahdaşlarının həbsdə olması onun özünün də katolikos postundan uzaqlaşdırılmasını tezləşdirir. Çünki Eçmiədzindəki yerli seçkilərdə də hakim “Vətəndaş müqaviləsi” partiyası qələbə qazanıb.

Jurnalistlərlə söhbət zamanı Paşinyan bildirib ki, “mənim günahlarım sizdən daha çoxdur”.

O bunu baş nazir vəzifəsinin məsuliyyəti ilə əlaqələndirib.

“Hər həftə günahlarımın bağışlanması üçün kilsəyə gedirəm və bu mənə kömək olur”, – deyə Ermənistanın Baş naziri əlavə edib.

Onun fikrincə, Ermənistanda dini yenidənqurma prosesi gedir. Erməni Apostol Kilsəsindəki imansızlıq da aradan qalxmaqdadır. Sadəcə, bunun üçün əsas maneə olan II Qaregini vəzifədən uzaqlaşdırmaq lazımdır.