Peruda tapılan iki yadplanetli cəsədi nümayiş edildi

Meksika parlamentinin iclasında yadplanetli olduğu təxmin edilən iki varlığın nəşi nümayiş etdirilib.

Min yaşlı olduğu təxmin edilən bu skeletlər Peruda aparılan qazıntılar zamanı tapılıb və alimlər iddia edirlər ki, onların bizim dünyamızla heç bir əlaqəsi yoxdur.

Cəsədlər bir tabutun içərisində nümayiş etdirilib. Meksika Milli Universitetinin alimləri iddia edirlər ki, bu skeletlərin analizi zamanı onlarda radioloji karbon qalıqları aşkar olunub. Tədqiqata qoşulan UNO mütəxəssisi Ceym Mossen də bu cəsədlərin dünyaya aid olmadığını təsdiq edib. O, daha əvvəl Peruda tapılmış 5 mumiyanın analizini aparıb, əlləri və ayaqlarında üç barmağı olan bu canlıların yadplanetli olduğu qənaətinə gəlib.

Harvard Universitetinin astronomu professor Abraham Avi Loeb də bildirib ki, Meksika hökuməti bu tədqiqatın nəticələrini dünyanın bütün alimlərinə yaymalı və yadplanetlilərin varlığına dair məlumatlar daha dəqiq araşdırılmalıdır.