Psixoloqdan valideynlərə 3 vacib məsləhət

Həftəiçi ev tapşırıqlarını yerinə yetirmək uşaqlar üçün adi hal olsa da, istirahət günlərində bu proses tez-tez müqavimətlə qarşılanır.

Həm özünüzün, həm də övladınızın həftəsonunu korlamadan onu dərslərini sakitcə yerinə yetirməyə yönləndirməyin üç səmərəli üsulu mövcuddur. Bu barədə rusiyalı psixoloq Yekaterina Nadelyayeva danışıb.

O bildirib ki, təzyiq göstərmək əvəzinə, uşaqla razılığa gəlmək və ona aydın dərs strukturu təklif etmək lazımdır.

1. Tapşırıqları bloklara bölün: Dərslərə asan tapşırıqlardan başlayın. Prosesi 25-50 dəqiqəlik hissələrə bölün və hər blokdan sonra 10-15 dəqiqəlik fasilə verin. Fasilə zamanı uşağın ayağa qalxması və fiziki hərəkət etməsi diqqəti yenidən cəmləməyə kömək edir.

2. Seçim hüququ verin: "Dərhal dərslərinə başla" kimi əmrlər verməyin. Bunun əvəzinə ondan dərslərini nə vaxt etmək istədiyini soruşun. Siz sadəcə çərçivəni müəyyən edirsiniz, vaxtı isə uşaq özü seçir. Bu, onun məsuliyyət hissini artırır, çünki artıq yerinə yetirilən plan sizin deyil, onun öz seçimidir.

3. Nəticəni deyil, cəhdi tərifləyin: Uşağı aldığı yüksək qiymətə görə deyil, göstərdiyi səyə görə tərifləmək ən vacib məqamdır. Yalnız mükəmməl nəticəyə görə təriflənən uşaq səhv etməkdən qorxur və cəhd etməyi dayandırır. "Afərin ki, özün həll etdin" və ya "Çətin olsa da, yarımçıq qoymadın" kimi ifadələr bütün "əla" qiymətlərdən daha təsirlidir.

Y.Nadelyayevanın fikrincə, ev tapşırığı uşaqlarda planlaşdırma, özünüidarə və dözümlülük vərdişlərini formalaşdıran bir vasitədir. Valideynin dəstəyi daimi nəzarət deyil, seçim hüququna hörmət və göstərilən səylərin təqdir edilməsidir.