Putindən Ermənistana xəbərdarlıq | Paşinyan bu seçimindən peşman olacaq? - Baku TV

Rusiya Prezidenti Vladimir Putin Ermənistanın Avrasiya İqtisadi İttifaqında (Aİİ) iştirakı ilə Avropa İttifaqının üzvlüyünə doğru irəliləməsinin bir-biri ilə uyğun gəlmədiyini bildirib.

Bu barədə Rusiya Prezidenti Vladimir Putin Şanxay Əməkdaşlıq Təşkilatının (ŞƏT) sammiti çərçivəsində Ermənistanın Baş naziri Nikol Paşinyanla görüşü zamanı deyib.

Rusiya lideri xatırladıb ki, bu məsələni Paşinyanla həm şəxsən, həm də telefon danışıqları zamanı dəfələrlə müzakirə edib.

Putin vurğulayıb ki, Moskva Ermənistanın və erməni xalqının ölkənin gələcək yolunu müstəqil şəkildə müəyyən etmək kimi suveren hüququnu tanıyır. Lakin onun sözlərinə görə, Avropa İttifaqı üzvlüyünə doğru irəliləmək Ermənistanın Aİİ-yə üzvlüyü üçün qaçılmaz olaraq müəyyən fəsadlar yarada bilər.

Putin bildirib ki, bu, Ermənistanın hazırda ümumi Avrasiya bazarında əldə etdiyi üstünlükləri itirməsinə, eləcə də mövcud ticarət zəncirlərinin pozulmasına səbəb ola bilər.

O eyni zamanda vurğulayıb ki, İrəvan kursunu dəyişərsə, Moskva da öz ticari-iqtisadi siyasətini buna uyğun tənzimləməli olacaq. Buna görə də Rusiya tərəfi Ermənistanın gələcək istiqamətini mümkün qədər tez müəyyən etməsində maraqlıdır.

Ermənistanın Baş naziri Nikol Paşinyan da Rusiya Prezidenti Vladimir Putinlə Bişkekdə ŞƏT sammiti çərçivəsində görüşündə bildirib ki, ölkəsi Rusiya ilə münasibətləri daha da inkişaf etdirməkdə və dərinləşdirməkdə maraqlıdır. O, son illərdə Ermənistan ətrafında və bütövlükdə regionda vəziyyətin əhəmiyyətli dərəcədə dəyişdiyini qeyd edib. Baş nazirin sözlərinə görə, Ermənistan-Rusiya münasibətləri münaqişə şəraitində müəyyən məna daşıyıb. Lakin regionda sülh bərqərar olduqdan sonra bu münasibətlərə artıq “təzə baxışla” yanaşılmalıdır.

Paşinyan belə bir yanaşmanın ikitərəfli əlaqələrin daha da inkişafına töhfə verəcəyini bildirib. Paşinyanın fikrincə, bu məsələ həm Ermənistanın, həm də Rusiyanın marağında olduğundan birgə həll edilməlidir. O bildirib ki, tərəflər konkret şirkətlərin vəziyyətini və mövcud problemləri ətraflı müzakirə etməlidirlər.