"Putinin təxribat hesab edə bilməyəcəyi təklifdir" | İtaliya XİN rəhbərindən açıqlama

“Yaxın vaxtlarda Ukraynada sülh gözləməyə dəyməz. Rusiyaya təsir göstərə biləcək yeganə vasitə yeni sanksiyalardır”.

Bunu İtaliyanın xarici işlər naziri Antonio Tayani "Rai News”ə bildirib.

Diplomatın sözlərinə görə, Ukraynada sülh perspektivləri hələ də uzaqdır. O, müharibənin tənzimlənməsində Milad bayramınadək hər hansı konkret dəyişikliyin gözlənilmədiyini vurğulayıb.

Antonio Tayani Putinin Avropa qoşunlarının Ukraynaya daxil olması halında onları "qanuni hədəf” hesab edəcəyi ilə bağlı hədələrini "mənasız” adlandırıb. O həmçinin İtaliyanın Ukrayna ərazisinə qoşun göndərməyəcəyini təsdiqləyib.

"Bunun əvəzinə biz başqa bir yol təklif edirik – NATO-nun 5-ci maddəsinə bənzər bir razılaşmanın bağlanması... Bu, Putinin təxribat hesab edə bilməyəcəyi, lakin Ukraynanın müstəqilliyini və təhlükəsizliyini təmin edəcək rasional təklifdir”, – deyə İtaliya diplomatiyasının rəhbəri əlavə edib.

Antonio Tayaninin fikrincə, Çindən qayıtdıqdan sonra Vladimir Putin Ukraynaya qarşı müharibənin yeni mərhələsini başladıb. O, Nazirlər Kabinetinə edilən hücumu buna misal olaraq çəkib.