Qətər İranı vurdu, ancaq əməliyyatlarda iştirakını təkzib etdi

İsrail Müdafiə Ordusu İranın infrastrukturuna qarşı həyata keçirilən silsilə zərbələrin başa çatdığını bildirib.

Bu barədə Ordunun mətbuat xidməti məlumat yayıb. Qeyd olunub ki, zərbələr Tehran və İsfahan şəhərlərində endirilib.

"İsrail Müdafiə Ordusu İranın silah istehsalı, xüsusilə ballistik raketlərin hazırlanması üçün istifadə etdiyi sənaye obyektlərinə zərbələr endirib. İsfahanda paralel şəkildə keçirilən əməliyyat zamanı isə ballistik raket kompleksi ilə əlaqəli onlarla hədəf, o cümlədən buraxılış qurğuları və raket anbarları vurulub", – deyə məlumatda bildirilib.

Qeyd olunub ki, İsrail İranın ballistik raket proqramı ilə əlaqəli obyektlərə qarşı zərbələri davam etdirəcək.

Bu arada, Qətər Silahlı Qüvvələri İran ərazisinə zərbələr endirsə də, ölkənin Xarici İşlər Nazirliyi İrana qarşı döyüş əməliyyatlarında iştirakını təkzib edib.

Bu barədə Qətər XİN-in rəsmi nümayəndəsi Məcid əl-Ənsari "X" sosial şəbəkəsindəki səhifəsində yazıb.

"Qətər Dövləti İrana qarşı müharibədə iştirak etmir, lakin özünümüdafiə və ölkəyə qarşı İran təcavüzünün qarşısını almaq üzrə qanuni hüququnu həyata keçirir", – deyə o yazıb.

Ənsari həmçinin yalnız Qətər dövlət orqanlarının rəsmi bəyanatlarına inanmağa çağırıb.