Qəzza xəstəxanasının vurulmasına beynəlxalq reaksiya: Netanyahu nə dedi?

Qəzza zolağında çoxsaylı insan ölümünə səbəb olan hücumla bağlı bir sıra dünya liderlərindən reaksiya gəlib.

Hadisəni kimin törətməsi barədə müxtəlif versiyalar var.

İsrailin Baş naziri Benyamin Netanyahu Qəzzada yüzlərlə insanın ölümü ilə nəticələnən hücumda İsrail hərbçilərinin əlinin olmasına dair iddiaları qətiyyətlə rədd edərək terrorun “İslami Cihad” tərəfindən həyata keçirildiyini açıqlayıb.

“Bütün dünya bilməlidir: Qəzzada xəstəxanaya İsrail Müdafiə Qüvvələri yox, terrorçular hücum ediblər. Uşaqlarımızı vəhşicəsinə öldürənlər öz övladlarını da öldürürlər”, – deyə Baş nazir “X” hesabında bildirib.

Amerika Birləşmiş Ştatlarının Prezidenti Cozef Bayden köməkçilərinə hücumun təfərrüatlarını aydınlaşdırmaq üçün məlumat toplamaq barədə göstəriş verib. Ağ Evin bəyanatında qeyd olunub ki, ABŞ birmənalı olaraq münaqişədə mülki şəxslərin müdafiəsini dəstəkləyir. Rəsmi Moskva hadisəni cinayət və insanlıqdan çıxma aktı kimi qiymətləndirib.

Rusiya Təhlükəsizlik Şurasının sədr müavini Dmitri Medvedev hücumu açıq-aşkar müharibə cinayəti adlandıraraq hadisədə ABŞ-nin günahkar olduğunu iddia edib.

Qardaş ölkə Türkiyənin mövqeyinə gəlincə isə Prezident Rəcəb Tayyib Ərdoğan bu barədə “X” hesabında yazıb.

“Qadınların, uşaqların və günahsız mülki şəxslərin olduğu xəstəxananın vurulması İsrailin fundamental insani dəyərlərdən məhrum hücumlarının son nümunəsidir. Bütün insanlığı bu dəhşəti dayandırmaq üçün hərəkətə keçməyə çağırıram. Qəzzada bu misli görünməmiş vəhşilik törədildi”, – deyə R.T.Ərdoğan paylaşımında qeyd edib.

İranın Xarici İşlər Nazirliyi də xəstəxanaya edilən hücuma görə İsraili günahdlandırıb.