"İran öz gücünə əmindir, lazım gələrsə..." | Bəqaidən ABŞ-yə sərt xəbərdarlıq - Baku TV

ABŞ-nin Körfəz ölkələri ilə birgə davam edən hərbi təlimləri ərəfəsində İranın Xarici İşlər Nazirliyindən açıqlama verilib.

ABŞ-nin regiondakı son hərbi yerləşdirmələri və İrana qarşı yeni sanksiyaların tətbiqi barədə danışan İran Xarici İşlər Nazirliyinin sözçüsü İsmayıl Bəqai deyib ki, İran ABŞ tərəfindən təşkil edilən “hibrid müharibə” ilə üzləşməkdə davam edir:

“Region ölkələri anlayırlar ki, təhlükəsizlik yalnız İrana təsir etmir. Bu qeyri-sabitlik yoluxucudur. İran öz gücünə əmindir və ötən ilin iyununda münaqişədən çıxarılan dərsləri yaxşı xatırlayır. Hər hansı təcavüz aktına əvvəlkindən daha sərt şəkildə cavab verəcəyik”.

İ.Bəqai ABŞ-nin İrana qarşı düşmən münasibətinin dəyişmədiyini vurğulayaraq 2025-ci ildə baş vermiş hücumları və İran iqtisadiyyatını zəiflətmək məqsədi daşıyan “iqtisadi terrorizm” siyasətini xatırladıb.

O qeyd edib ki, ABŞ Hərbi Dəniz Qüvvələrinin regiona gəlişi İranın öz suverenliyini və xalqını müdafiə etmək əzmini zəiflətməyəcək. İ.Bəqainin sözlərinə görə, İran Silahlı Qüvvələri regiondakı prosesləri yaxından izləyir və öz imkanlarını davamlı şəkildə gücləndirir.

Qeyd olunub ki, İran ABŞ-nin Yaxın Şərqə qoşun göndərməsi və hədələr səsləndirməsini beynəlxalq normaların pozulması kimi qiymətləndirir.