Rəisinin düşdüyü qəzanın bütün detalları ortaya çıxdı

“Uçuş zamanı hava şəraiti əlverişli idi, bulud örtüyü məhdud ərazidə idi”.

Bunu Prezident İbrahim Rəisini müşayiət edən helikopterdə olan İran Prezident Aparatının rəhbəri Qulamhüseyn İsmaili qəza ilə bağlı IRIB agentliyinə müsahibəsində deyib.

Bildirib ki, mayın 19-u günorta saat bir radələrində heç bir xüsusi hava hadisəsi olmadığından uçuş həyata keçirilib:

“Yaxşı və aydın havada Təbrizə uçuş başladı. 45 dəqiqəlik hərəkətdən sonra mədən yaxınlığındakı dərədə bulud ləkəsi müşahidə olunurdu.

Prezidenti daşıyan helikopterin pilotu səhra komandiri kimi digər pilotlara bildirir ki, buludlardan yuxarı çatmaq üçün yüksəkliyə qalxsınlar. Ortadakı helikopter Prezidenti daşıyırdı. Pilotumuz 30 saniyə buludların üzərində yolu davam etdirdikdən sonra ortadakı helikopterin olmadığını anladı”.

Onun sözlərinə görə, ortadakı helikopter yuxarı qalxmadığı üçün Aparat rəhbərinin olduğu nəqliyyat vasitəsinin pilotu dönərək geri qayıdıb.

Qulamhüseyn İsmaili bu səbəbdən İranın mərhum xarici işlər naziri Hüseyn Əmir-Abdullahiana və mühafizə komandirinə dəfələrlə zəng etdiyini, lakin heç birinin cavab vermədiyini söyləyib:

“Ondan qayıtmağının səbəbini soruşdum. Ortadakı helikopterin gəlmədiyini dedi. Qayıdaraq onları tapmaq qərarına gəldik. Bulud olan bu hissədə aşağını görə bilmirdik, buludun altına qayıtmaq mümkün deyildi. Nə qədər radio rabitəsi qurmağa çalışsaq da, mümkün olmadı.

Bir-iki dəqiqədən sonra Süngün mis mədəninə endik və məsələni izləməyə başladıq. Uçuş heyəti bildirdi ki, kapitan Mustəfəvi ilə telefon əlaqəsi saxladıq, cənab Əl-Haşim cavab verdi və dedi ki, vəziyyətim yaxşı deyil və dərəyə düşmüşük. Xüsusi bir şey demədi. Sonra mən həmin telefona zəng etdim və cənab Əl-Haşim cavab verdi.

Soruşdum ki, necəsən? Dedi ki, vəziyyətim yaxşı deyil. Onun ağrısı var idi. Nə baş verdiyini soruşdum. Dedi ki, nə baş verdiyini bilmirəm. Ağacların arasına düşdüyünü bildirdi. Digər yoldaşları haqda soruşdum. Dedi ki, onların heç birini görmürəm və ətrafımda heç kim yoxdur. Sonra meşənin xüsusiyyəti haqda məlumat verdi”.

Prezident Aparatının rəhbərinin sözlərinə görə, xilasedicilər dərhal hadisənin baş verdiyi təxmin edilən əraziyə yollanıb. Qəza yeri aşkar edildikdən sonra məlum olub ki, helikopterdə olan sərnişinlərin hamısı həlak olub.