“Rubikon”un məxfi bazasının Moskva ətrafında yerləşdiyi məlum olub

Kremlin informasiya ruporu olan, Azərbaycana qarşı qərəz və isterik davranışları ilə “populyarlıq” qazanan Vladimir Solovyov Rusiyanın gizli bazasını açığa çıxarıb.

Söhbət mövcudluğu 2024-cü ildən ictimaiyyətə məlum olan “Rubikon”dan gedir. Sən demə bu elit dəstənin bazası Moskva ətrafında yerləşirmiş.

Vladimir Solovyov Rusiya Müdafiə Nazirliyinin elit dəstəsi olan “Rubikon”da şəkil çəkdirib və bununla özü də bilmədən gizli bazanın yerini açığa çıxarıb.

UNİAN-da yayılan məlumata görə, Solovyovun “Rubikon”da yayılan fotolarından sonra bazanın Moskva ətrafında yerləşdiyi müəyyənləşib.

Pilotsuz texnologiya üzrə ixtisaslaşan elit dəstə haqqında ictimaiyyət ilk dəfə 2024-cü ildə müdafiə naziri Andrey Belousovun “Rubikon”a baxış keçirdiyi vaxt xəbərdar olub. Daha sonra “Rubikon”un Kurskda uğur qazandığı barədə informasiya yayılıb.

Rusiyanın elit dəstəsi Kupyansk, Pokrovsk, Xarkov, Uqledar və Donetskin cənubunda əməliyyatlar keçirib. “Rubikon”un əsas vəzifəsi nəzarətə götürülən ərazilərdə PUA operatorlarının hazırlanmasıdır. İndiyədək dəstə 400 Ukrayna texnikasını sıradan çıxarıb. Hər halda Kiyev bu iddianı təkzib edib.

“Rubikon”a polkovnik Sergey Budnikovun başçılıq etdiyi bildirilir. O, əslən Belqoroddandır, hərbi dəniz qüvvələri və artilleriya təcrübəsi var.