Rusiya PUA-ları yenidən Xarkov vilayətini hədəf aldı | Ölən və yaralılar var

“Rusiyanın “Şahed” pilotsuz təyyarələri ilə Ukraynanın Xarkov şəhərini vurması nəticəsində 3-ü xilasedici olmaqla 7 nəfər həlak olub, 12 nəfər yaralanıb”.

Bu barədə Xarkov Vilayət Dövlət Administrasiyasının rəhbəri Oleq Sinequbov məlumat verib.

Onun sözlərinə görə, xəstəxanaya yerləşdirilən yaralılardan birinin vəziyyəti ağırdır. Kamikadze dronlarının hücumu nəticəsində yaşayış və hündürmərtəbəli binaya ziyan dəyib. Şəhərin bəzi ərazilərində elektrik enerjisinin verilişində fasilələr yaranıb. Bütün fövqəladə hallar və ictimai xidmətlər, eləcə də könüllülər dağıntıların aradan qaldırılmasına cəlb olunublar.

Hadisə ilə bağlı Ukrayna Silahlı Qüvvələri də məlumat yayıb. Baş Qərargahdan bildirilib ki, ölkə ərazisinə “Şahed” tipli 20 pilotsuz uçuş aparatı ilə hücum edilib. Ukrayna Hava Hücumundan Müdafiə Sistemləri 11 PUA-nı havada zərərsizləşdirsə də, 9-u ölkənin müxtəlif ərazilərinə düşüb.

Ukraynanın Zaporojye vilayətində də partlayış səsləri eşidilib. Bu barədə məlumatı isə Zaporojye vilayəti administrasiyası yayıb. İlkin ehtimallara görə, sözügedən ərazilər də aviazərbələrə məruz qalıb.

Xatırladaq ki, bundan əvvəl Ukrayna Silahlı Qüvvələrinin Hərbi Hava Qüvvələri ölkənin bir sıra regionlarında ballistik raket və PUA hücumu ilə bağlı xəbərdarlıq edib.