Rusiya raket yağdırdı | Şiddətli zərbələr Ukraynada dəhşətli anlara səbəb oldu

İyunun 19-dan 20-nə keçən gecə Rusiya Silahlı Qüvvələri Ukraynanın Odessa və Xarkov şəhərlərini raket və dronlarla atəşə tutub.

Hücum nəticəsində Odessada çoxmərtəbəli yaşayış binası, fərdi yaşayış evləri və iaşə obyektlərində yanğınlar baş verib. 4 mərtəbəli bina isə tamamilə yanaraq yararsız vəziyyətə düşüb. 1 nəfər ölüb, 14 nəfər yaralanıb.

“Xilasedicilər yanğın baş verən binanın dağıntıları altından 3 nəfəri çıxarıb, daha bir sakinin axtarışları davam edir. Xilasetmə əməliyyatları zamanı yanğınsöndürənlər də dağıntılar altında qalıb, 3 nəfər ağır yaralanıb və xəstəxanaya yerləşdirilib”, ‒ deyə Odessa vilayətinin Fövqəladə Hallar Xidmətindən bildirilib.

Bununla yanaşı, PUA-nın 23 mərtəbəli binaya çırpılması nəticəsində son 3 mərtəbə alışıb, 600 nəfər təxliyə edilib. “Şahed” kamikadze dronları ilə Xarkova hücum da yanğınlara səbəb olub, insanlar yaralanıb. Gecə ərzində Sumıda da hava hücumu təhlükəsi siqnalı işə düşüb.

Rusiya Müdafiə Nazirliyindən isə bildirilib ki, gecə ərzində hava hücumundan müdafiə qüvvələri Ukraynaya məxsus 61 PUA-nı məhv edib. Məlumatda vurğulanıb ki, hücum nəticəsində mülki şəxslər arasında zərərçəkən olmayıb.