Rusiya-Ukrayna cəbhəsində gərginlik pik həddə

Rusiya qüvvələri Ukraynaya yeni kütləvi zərbə endirə bilər.

Bu barədə Ukrayna Prezidenti Volodimir Zelenski axşam müraciətində bildirib. O, vətəndaşları hava həyəcanı siqnallarını diqqətlə izləməyə çağırıb.

"Rusların kütləvi zərbə endirə biləcəyinə dair kəşfiyyat məlumatları və hava hücumundan müdafiə üçün müvafiq sərəncamlarımız artıq verilib", – Ukrayna lideri vurğulayıb.

Bazar ertəsi Rusiya Silahlı Qüvvələrinin yeni kütləvi zərbə təhlükəsi barədə məlumatları yerli "Telegram" kanalları da yayıb.

Bu arada Ukrayna Müdafiə Nazirliyi yerli istehsal olan yeni dron əleyhinə "JEDI Shahed Hunter" aparatının istifadəsini təsdiqləyib.

Məlumata görə, aparat 350 km/saat-dan çox sürət yığmaq, 6 kilometr hündürlüyə qalxmaq və təxminən 500 qram ağırlığında döyüş başlığı daşımaq qabiliyyətinə malikdir. Şaquli uçuş həyata keçirə bilən dronun çəkisi təxminən 4 kq-dır və sutka boyu işləməyə imkan verən termal kameralarla təchiz olunub. Bir aparat 40 km radiusda səmanı qoruya bilir.