Rusiya yenidən Xarkova hücuma keçdi

Ukraynada müharibə davam edir. Baku TV-nin bu ölkədə olan əməkdaşı Mübariz Aslanov cəbhənin qaynar nöqtələrindən biri olan Xarkov vilayətinin Kupyansk şəhərində olub.

Qeyd edilib ki, artıq bir neçə gündür yaxın məsafəli artilleriya zərbələrinə ara verməyən Rusiya Ordusu şəhər istiqamətində quru qoşunları ilə də hücuma keçib. Çəkilişlər zamanı Ukrayna Silahlı Qüvvələri Rusiyanın 10 hücum cəhdinin qarşısını alıb.

Kupyansk meri Andrey Besedin Baku TV-yə açıqlamasında bildirib ki, şəhər hər gün atəşə tutulur:

“Terrorçu ölkə olan Rusiya yalnız mülki əhali, kritik infrastrukturla mübarizə apara bilir və bizim şəhərlərimizi dağıdır. Burada müharibəyə aid heç nə yoxdur. Bu, soyqırımı və terror aktıdır. Biz Ukrayna Silahlı Qüvvələrinə, bizi qoruyan hərbçilərimizə inanırıq. Onlar yavaş-yavaş şəhərlərimizi, qəsəbələrimizi azad edirlər. Bu il Kupyanskda 20-dən çox mülki vətəndaş həlak olub, 40-dan çox insan yaralanıb. Burada mənzil fondunun 35-40 faizinə ziyan dəyib. Kupyansk şəhərinin mərkəzi hissəsindəki binaların 98 faizi dağılıb”.