Rusiyada 27 terror aktının qarşısı alındı | FTX məlumat yaydı

2024-cü ildə Rusiyada nəqliyyat, yanacaq-energetika və müdafiə sənayesi obyektlərində 27 terror aktının qarşısı alınıb.

Bu barədə Rusiya Milli Antiterror Komitəsinin sədri, Federal Təhlükəsizlik Xidmətinin direktoru Aleksandr Bortnikov açıqlama verib.

Bildirib ki, düşmən nəqliyyat və yanacaq-energetika infrastrukturunun mühüm elementlərinə, müdafiə sənayesi müəssisələrinə və həyat təminatı sisteminin obyektlərinə ziyan vurmaq istiqamətində fəaliyyətini gücləndirib.

Onun sözlərinə görə, hərbi müdafiənin təmin edilməsində iştirak edən obyektlərin mühafizəsinin gücləndirilməsi üçün dövlət orqanları və hüquq-mühafizə orqanları tərəfindən tədbirlər görülür.

Bundan əlavə, A.Bortnikov xatırladıb ki, Ukrayna təxribat və kəşfiyyat bölmələrinin Rusiya ərazisinə soxulmaq cəhdlərinin qarşısı da alınıb.

"Ukraynalı neonasistlər və onların qərbli himayədarları ölkəmizin ərazisində ən vəhşi cinayətlərin törədilməsini təşkil edirlər. Eyni zamanda beynəlxalq terror təşkilatının üzvlərindən cinayətlərin icraçısı kimi istifadə edirlər. Çoxsaylı mülki itkilərlə Krasnoqorskda son faciəvi hadisələr də buna sübutdur”, – deyə Federal Təhlükəsizlik Xidmətinin direktoru bildirib.