Rusiyada korrupsiyaya yaşıl işıq

Rusiya hökuməti deputatların və məmurların illik gəlir bəyannaməsi verməkdən azad edilməsini dəstəkləyib.

Müvafiq qanun layihəsi dekabrın 10-da müxtəlif partiyaları təmsil edən deputatlar tərəfindən Vasili Piskaryovun rəhbərliyi ilə Dövlət Dumasına təqdim edilib.

Sənədə əsasən, vəzifəli şəxslər, dövlət qulluqçuları və parlamentarilər yalnız bir neçə halda gəlirləri və əmlakları barədə məlumat təqdim etməli olacaqlar: dövlət qulluğuna qəbul edilərkən, başqa quruma keçilərkən və ya hakimiyyət orqanlarına onların son üç il ərzində ailənin ümumi gəlirini aşan iri xərcləri barədə məlumat daxil olduqda.

Hökumətin qanunvericilik fəaliyyəti üzrə komissiyası bu qanun layihəsini dəstəkləyib.

Qanun layihəsinin təşəbbüskarı Vasili Piskaryov daha əvvəl bildirmişdi ki, hazırda antikorrupsiya nəzarətinin elektron sistemi vəzifəli şəxslərin gəlirlərini daim izləyir və bu səbəbdən onların hər il gəlir bəyannaməsi doldurmasına məcbur edilməsinin heç bir mənası yoxdur.