Rusiyada miqrantlara hücum | Terrordan sonra hansı tədbir görüldü?

Rusiyada Mərkəzi Asiyadan olan miqrantlara qarşı görülən təhlükəsizlik və digər tədbirlərin həcmi 70% artıb.

Beynəlxalq qeyri-hökumət təşkilatı “Human Rights Watch”un yaydığı məlumata görə, martın 22-də “Crocus City Hall”da baş verən terror aktından sonra ölkədə miqrasiya qanunlarının pozulması iddiası ilə miqrantlara qarşı açılan məhkəmə işlərinin sayı 2024-cü ilin orta göstəricisi ilə müqayisədə 70% artıb.

Bundan əlavə, sözügedən hadisədən sonra Mərkəzi Asiyadan olan miqrantlar və qeyri-slavyan görünüşlü digər şəxslər təqib və etnik zəmində hücumlarla üzləşirlər. Onlar işdən azad edilmə, fiziki hədə-qorxu və ksenofobik zorakılıq kimi hallarla üz-üzə qalıblar.

Lakin Rusiya hakimiyyəti sözügedən zorakılıq və təqib hallarını pisləmək əvəzinə Mərkəzi Asiyadan olan miqrantlara, xüsusilə də Tacikistan vətəndaşlarına qarşı əsassız reydlər və yoxlamalar həyata keçirib.

Bütün bunların nəticəsində isə miqrantlara qarşı məhkəmə iddiaları hücumdan sonra orta hesabla 70% artaraq pik həddə çatıb.

Məlumat üçün bildirək ki, martın 22-də Moskvada yerləşən “Crocus City Hall” konsert zalında baş verən terror aktı nəticəsində azı 144 nəfər həlak olub, yüzlərlə insan yaralanıb. 95 nəfər isə itkin düşmüş şəxs kimi qeydiyyata alınıb.