Rusiyaya aparılan Ukraynalı azyaşlılar harada saxlanılır?

Rusiyanın Ukraynada 1 ildən çoxdur apardığı xüsusi hərbi əməliyyatın görünən tərəfləri ilə yanaşı, görünməyən dəhşətləri də var.

Hər gün səmada uçuşan raketlər minlərlə ukraynalının həyatına son qoyur, eləcə də uşaqların həyatını qaranlığa qərq edir. Söhbət psixoloji travmaya məruz qalan, müharibənin hələ də getdiyi, eləcə də işğal olunan ərazilərdən qanunsuz yollarla kütləvi şəkildə Rusiyaya deportasiya edilən ukraynalı uşaqlardan gedir. Bəs həmin azyaşlılar indi haradadırlar?

Məsələ ilə bağlı rusiyalı politoloq Sergey Markov bildirib ki, aparılan uşaqların hamısı çox yaxşı vəziyyətdədirlər: “Onlar təhsil alır və vaxtlı-vaxtında tibbi müayinədən keçirlər. Onların əksəriyyəti dəniz sahilindəki düşərgələrdədirlər, yəni istirahət etmək imkanları da var. Bu uşaqlar müharibənin getdiyi ərazilərdən xilas ediliblər. Azyaşlılar ata-analarının razılığı ilə Ukrayna ərazisindən çıxarılıblar. Valideynlərin 99%-i özləri rusiya hərbçilərindən övladlarını xilas etmələrini xahiş ediblər. İndi isə Ukrayna tərəfindən sıxışdırılaraq bəyan etməyə başlayıblar ki, guya Rusiya hakimiyyəti onların uşaqlarını əllərindən alıb. Çünki desələr ki, övladlarını Rusiya düşərgələrinə özləri göndəriblər, onları güllələyəcəklər”.

Məlumat üçün bildirək ki, 2022-ci il fevralın 24-dən, yəni Ukraynada xüsusi hərbi əməliyyat başlayan gündən cari ilin iyun ayına qədər bu ölkədən Rusiyaya 19 500-dən çox uşaq deportasiya edilib. Onların əksəriyyəti Ukraynanın Mariupol, Xerson, Xarkov və Kiyev vilayətlərindən çıxarılıb.