Saakaşvilidə civə və qurğuşun aşkar edilib

Gürcüstanın eks-prezidenti Mixeil Saakaşvilinin analizlərində civə, mərgümüş, tallium, qurğuşun, vismut və barium aşkar edilib.

Dekabrın 19-da Gürcüstanın Empati Tibb Mərkəzinin rəhbəri Mariam Cişkariani jurnalistlərə bildirib ki, siyasətçinin ciddi diaqnozlarının əksəriyyəti zəhərlənmə ilə bağlı ola bilər.

“Mixeil Saakaşvilinin qanında, saçında və dırnaqlarında civə, mərgümüş, tallium, qurğuşun, vismut və barium aşkar edilib. Çox güman ki, biz naməlum, mürəkkəb kimyəvi və ya radioaktiv birləşmə ilə üzləşmişik”, - deyə o bəyan edib.

M.Cişkariani əlavə edib ki, Saakaşviliyə təcili olaraq orqanizmini təmizləmək lazımdır, lakin onun sözlərinə görə, Gürcüstan tibb müəssisələrində belə bir proseduru etmək mümkün deyil.