Sutka ərzində 154 döyüş qeydə alındı | Rusiyanın itkiləri...

Rusiya Ordusu Ukraynanın bir neçə şəhərini dron və raketlərlə atəşə tutub.

Nikolayev şəhərində sənaye infrastrukturuna zərbələr endirilib. Şəhərin hərbi administrasiyasından bildirilib ki, hücumda “Şahed” tipli PUA-lardan istifadə edilib. Nəticədə sənaye infrastrukturuna ciddi ziyan dəyib. Hadisə nəticəsində xəsarət alan olmayıb.

Rusiya Ordusunun hava hücumu səbəbi ilə paytaxt Kiyevdə həyəcan siqnalı səsləndirilib. Səhər saatlarında Sumıya da raketlərin istiqamətləndiyi barədə xəbərdarlıq edilib. Bir müddət sonra isə raket təhlükəsi ləğv edilib.

Ukrayna Silahlı Qüvvələri də PUA ilə Rusiyanın bir neçə şəhərinə hücum edib. Vladimir vilayətinin qubernatoru Aleksandr Avdeyev bildirib ki, şəhərdə yerləşən enerji infrastrukturuna dronlarla atəş açılıb.

Qeyd edək ki, Vladimirskaya yarımstansiyası Rusiyada ən güclü yarımstansiyalardan biridir və enerji sistemi üçün böyük strateji və texniki əhəmiyyətə malikdir.

Bununla yanaşı, Oryol şəhərində Rusiyanın enerji obyekti hücuma məruz qalıb. Partlayışlar baş verib.

Ukrayna Silahlı Qüvvələrinin Baş Qərargahından bildirilib ki, son sutka ərzində Rusiyanın 900 hərbçisi məhv edilib. 500 hərbi texnika və silah-sursat zərərsizləşdirilib. Cəbhədə 154 döyüş baş verib. Hərbi toqquşmaların əksəriyyəti Pokrovsk istiqamətində qeydə alınıb.

Rusiya Müdafiə Nazirliyinin məlumatına görə, hava hücumundan müdafiə qüvvələri gecə ərzində Ukraynanın 40 PUA-sını məhv edib.