Tehrandan İsrail Ordusuna Livan xəbərdarlığı: "Cavabımız sərt olacaq" - Baku TV

ABŞ Prezidenti Donald Tramp tərəfindən müharibənin başa çatdığının elan edilməsindən sonra İsrail Ordusu Livanın cənubunda atəşkəsi 84 dəfə pozub və dinc sakinlər qətlə yetirilib.

Bu barədə İranın “Xatəm əl-Ənbiya” Hərbi Komandanlığının məlumatında bildirilib.

“Əgər İsrail Ordusu Livanın cənubuna hücumları dayandırmasa, İran sərt cavab verəcək”, – deyə komandanlıq xəbərdarlıq edib.

Livan Prezidenti Cozef Aun isə bildirib ki, İsraillə danışıqlar kursu Tehran və Vaşinqton arasında Yaxın Şərqdə müharibənin sona çatdırılması üçün əldə edilən qarşılıqlı anlaşmadan ayrıdır. O, ölkəsinin aparılan danışıqlarda müstəqil mövqe tutduğunu və qərarlarını suveren şəkildə qəbul etdiyini vurğulayıb.

Bu arada, İsrail Müdafiə Ordusu Qəzza zolağına zərbələr endirib, nəticədə HƏMAS-ın iki komandiri öldürülüb. Belə ki, HƏMAS-ın taqım komandiri Məhəmməd Səid Əhməd Nimroti və "İslami Cihad" qruplaşmasının taqım komandiri Müaviyə Süleyman Zəkər Aydi zərərsizləşdirilib. HƏMAS və "İslami Cihad" hələlik bu açıqlamanı şərh etməyib.