Tehranın hərbi imkanları zəifləyib?

"İranın hərbi imkanları ciddi şəkildə zəifləyib".

Bunu İsrailin Baş naziri Benyamin Netanyahu mətbuat konfransında çıxışı zamanı bildirib.

"Biz İranın Xəzər dənizindəki bütün donanmasını məhv etdik. Onlar artıq uranı zənginləşdirə və ballistik raketlər istehsal edə bilmir. İran heç vaxt olmadığı qədər zəifdir, İsrail isə regionda və hətta dünyada güc mərkəzlərindən birinə çevrilib", – deyə o qeyd edib.

Netanyahu həmçinin İranın daxilində baş verə biləcək proseslərin hələ qeyri-müəyyən olduğunu və İran xalqının yaranmış şəraitdən istifadə edib küçələrə çıxıb-çıxmayacağı barədə danışmağın hələ tez olduğunu bildirib.

"Biz bunun üzərində işləyirik və buna ümid edirik, amma sonda hər şey onların özündən asılı olacaq. Həmçinin nəzərinizə çatdırım ki, İran bizə zərbələr endirməyə çalışır, bu da zərərə və itkilərə səbəb olur. Lakin bu hücumların miqyası gözlədiyimizlə müqayisə oluna bilməz, çünki onların imkanlarının böyük hissəsi artıq məhv edilib. Biz SEPAH qüvvələrinin minimum səviyyəyə endirilməsinə nail olacağıq", – deyə hökumət başçısı sözlərini yekunlaşdırıb.