Tehranın tərəfdaşlıq strategiyasının arxa planı - Baku TV

“Modern Diplomacy” yazır ki, Çin İsrail kəşfiyyatı “Mossad”ın İranda apardığı əməliyyatların effektivliyindən ciddi narahatdır.

Pekin hesab edir ki, İsrailin İranın daxili proseslərinə nüfuz etməsi Çinin iqtisadi və logistika maraqlarına birbaşa təsir göstərir.

İran Çinin “Bir kəmər, bir yol” təşəbbüsündə mühüm marşrutlardan biri hesab olunur. Bu səbəbdən ölkədə qeyri-sabitlik Çinin əsas tədarük yollarının dayanıqlığını poza bilər. Bunun fonunda Tehranın Pekindən texniki dəstək istədiyi də iddia olunur.

Çin Xarici İşlər Nazirliyinin sözçüsü Mao Ninq bildirib ki, Pekin İranın mövcud çətinliklərin öhdəsindən gəlməsini dəstəkləyir və xarici qüvvələrin ölkələrin daxili işlərinə müdaxiləsinə qarşıdır.

Məlumata görə, Çin şirkətləri İran üçün uzaqdan monitorinq və kəşfiyyat sistemlərinin hazırlanmasına cəlb olunub. Həmçinin İranın ABŞ GPS sistemindən imtina edərək Çinin “BeiDou” naviqasiya sisteminə keçməyi planlaşdırdığı bildirilir.

Ekspertlər hesab edirlər ki, İranda mümkün rejim dəyişikliyi Çin də daxil olmaqla İranla enerji və ticarət əlaqələri olan tərəfdaşlar üçün ciddi risklər yarada bilər. Bu kontekstdə Pekinin ABŞ və İsrailin fəaliyyətlərini neytrallaşdırmağa yönəlmiş daha geniş strategiya həyata keçirdiyi iddia olunur.

Qərb və İsrail xüsusi xidmət orqanlarının İranda fəaliyyəti ilə bağlı iddialar təkcə Tehranın müttəfiqləri deyil, İran daxilində də səsləndirilir.

Analitiklər isə Yaxın Şərqdə Çin və Qərbin siyasi-iqtisadi maraqlarının toqquşmasının regionda balansı dəyişdirdiyini vurğulayırlar.