Ukrayna 2027-ci ildə Aİ-yə qəbul ediləcək?

"Ukraynanın müharibədən sonrakı bərpası və yenidən qurulması üçün maliyyə ehtiyacları ilə bağlı Avropa İttifaqı liderlərinə təqdim edilən plan "maliyyə bombası" kimi xarakterizə edilə bilər".

Bunu jurnalistlərə Macarıstanın Baş naziri Viktor Orban bildirib. O eyni zamanda qeyd edib ki, həmin sənədin məzmununu açıqlamamalıdır.

"Biz transatlantik münasibətləri müzakirə etmək üçün fövqəladə sammitə toplaşdıq və geniş maliyyə öhdəliklərini, Ukraynanın Avropa İttifaqına sürətli inteqrasiyasını nəzərdə tutan bu sənədi əldə etdik", – deyə Orban qeyd edib.

O, təklif edilən maliyyələşdirmə modelini kəskin tənqid edərək vurğulayıb ki, belə planın həyata keçirilməsi Avropa İttifaqının borc yükünün artması deməkdir.

Onun sözlərinə görə, Macarıstan ayrı-ayrı ölkələrin Ukraynaya maliyyə yardımı göstərməsinə qarşı deyil, lakin bu, Avropa İttifaqının ümumi büdcəsi hesabına olmamalıdır.

Orbanın fikrincə, yardım Avropa İttifaqının mexanizmləri vasitəsilə deyil, könüllü şəkildə və hər bir ölkə tərəfindən fərdi olaraq göstərilməlidir.

"Sənəd Ukraynanın növbəti 10 il üçün 800 milyard avro məbləğində maliyyələşdirmə tələblərinə əsaslanır. Birinci mərhələdə 500 milyard, ikinci mərhələdə isə 300 milyard avro nəzərdə tutulur", – deyə Macarıstanın Baş naziri bildirib.