Ukraynada siyasi vəziyyət gərginləşir | Zelenski ABŞ və Avropadan əsas istəyini açıqladı - Baku TV

“Bu, doğrudur ki, 3 fərqli sənəd var? Bəli, bu, doğrudur. Biz amerikalılarla və artıq avropalılarla da danışıqlar aparırıq. Çox şadam ki, avropalı həmkarlarımızı da bu danışıqlara cəlb edə bilmişik. 3 sənəd var, birinci 20 bənddən ibarətdir və daim dəyişikliklər olur. Bu, normal haldır, Ukrayna, Avropa və bütün dünya üçün maraqlı olmalıdır.

İkinci sənəd təhlükəsizlik zəmanətləridir. Biz bunun üzərində işləyirik. Bizim komandanın ABŞ ilə dialoqlarından müvafiq təklifləri səbirsizliklə gözləyirəm. Bütün bunlar Könüllülər Koalisiyasının prinsipləri ilə uyğunlaşdırılmalıdır. Təhlükəsizlik zəmanətləri bizimlə Amerika Birləşmiş Ştatları arasında vacib bir sənəddir”.

Bu fikirləri Ukrayna Prezidenti Volodimir Zelenski açıqlamasında bildirib.

O əlavə edib ki, üçüncü sənəd bərpa prosesinə aiddir. Bu, müharibə bitdikdən və ya atəşkəs əldə olunduqdan sonra reallaşdırılacaq layihədir.

Ukrayna Prezidenti Volodimir Zelenski ABŞ Prezidenti Donald Trampın ölkədə seçki keçirilməsi çağırışını da şərh edib.

“Mən hər zaman seçkiyə hazıram”, – deyə V.Zelenski bildirib.

Bununla yanaşı, o, ABŞ və Avropanı ölkəsində keçiriləcək seçkilərin təhlükəsizliyini təmin etməyə çağırıb:

“Xahiş edirəm və açıq şəkildə bildirirəm ki, ABŞ mənə, ola bilər ki, avropalı həmkarlarımızla birlikdə seçkilərin təhlükəsizliyini təmin etməkdə kömək etsin. Onda növbəti 60-90 gün ərzində Ukrayna seçkilər keçirməyə hazır olacaq. Şəxsən mənim buna hazırlığım var”.